ഇന്ത്യയ്ക്കെതിരായ ഒന്നാം ഏകദിനത്തിന് പിന്നാലെ പ്രതികരണവുമായി ദക്ഷിണാഫ്രിക്കൻ ക്രിക്കറ്റ് ടീം ക്യാപ്റ്റൻ എയ്ഡാൻ മാർക്രം. ദക്ഷിണാഫ്രിക്കയുടെ പോരാട്ടത്തിൽ അഭിമാനമുണ്ടെന്നാണ് മാർക്രത്തിന്റെ വാക്കുകൾ. വലിയ വിജയലക്ഷ്യം പിന്തുടരുമ്പോഴും ആരും പ്രതീക്ഷ കൈവിടാതെ പോരാടിയെന്നും ദക്ഷിണാഫ്രിക്കൻ നായകൻ പറഞ്ഞു.
'വലിയ വിജയലക്ഷ്യമായിരിന്നിട്ടും ദക്ഷിണാഫ്രിക്കൻ നന്നായി പൊരുതി. ഓരോ താരങ്ങളും അവരുടെ അവരുടെ ജോലി ഭംഗിയായി ചെയ്യുന്നത് കണ്ടത് സന്തോഷമുണ്ട്. അവർ ഒരിക്കലും പ്രതീക്ഷ കൈവിട്ടില്ല. ഞങ്ങൾ എല്ലാവർക്കും പ്രതീക്ഷയുണ്ടായിരുന്നു. മറുപടി ബാറ്റിങ്ങിൽ ദക്ഷിണാഫ്രിക്കയുടെ ടോപ് ഓർഡർ തകർന്നത് മത്സരത്തിൽ നിർണായകമായി. ചെയ്സിങ്ങാണ് ജയിക്കാൻ നല്ലതെന്ന് ടോസിന് മുമ്പെ തോന്നിയിരുന്നു. പക്ഷേ ടോപ് ഓർഡർ നന്നായി കളിച്ചില്ല,' മത്സരശേഷം മാർക്രം പറഞ്ഞു.
'ദക്ഷിണാഫ്രിക്കയ്ക്ക് മെച്ചപ്പെടുത്താൻ ചില കാര്യങ്ങളുണ്ട്. സ്വിംഗ് ചെയ്യുന്ന പന്തിനെ നേരിടാൻ ടോപ് ഓർഡർ കൂടുതൽ ശ്രദ്ധിക്കണം. ഫീൽഡിലും ചില കാര്യങ്ങൾ മെച്ചപ്പെടുത്താനുണ്ട്. കോർബിൻ ബോഷും മാർകോ ജാൻസനും ദക്ഷിണാഫ്രിക്കൻ ബാറ്റിങ്ങിന്റെ ആഴം വർദ്ധിപ്പിക്കുന്നു. സമീപകാലത്ത് അവരുടെ ബാറ്റിങ് മികച്ചതായിരുന്നു. നല്ല ക്രിക്കറ്റ് കളിക്കാനാണ് ദക്ഷിണാഫ്രിക്ക ആഗ്രഹിക്കുന്നത്,' എയ്ഡാൻ മാർക്രം വ്യക്തമാക്കി.
ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിൽ ഇന്ത്യ 17 റൺസിനാണ് വിജയിച്ചത്. മത്സരത്തിൽ ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറിൽ എട്ട് വിക്കറ്റ് നഷ്ടത്തിൽ 349 റൺസെടുത്തു. ദക്ഷിണാഫ്രിക്കയുടെ മറുപടി 49.2 ഓവറിൽ 332 റൺസിൽ അവസാനിച്ചു. വിജയലക്ഷ്യത്തിലേക്ക് ബാറ്റുവെച്ച ദക്ഷിണാഫ്രിക്ക മൂന്നിന് 11 എന്നും പിന്നീട് അഞ്ച് വിക്കറ്റ് നഷ്ടത്തിൽ 130 റൺസെന്നും തകർന്നതിന് ശേഷമാണ് 332 എന്ന സ്കോറിലേക്കെത്തിയത്. മുൻനിരയുടെ സംഭാവനകൂടിയുണ്ടായിരുന്നെങ്കിൽ മത്സരഫലം മറ്റൊന്നാകുമായിരുന്നു.
Content Highlights: Really proud to the fight of South Africa says Aiden Markram